ສະຖານເອກອັກຄະຣາຊະທູດໄທ ປະຈຳ ສປປ ລາວ ຈັດກິດຈະກຳສະເຫຼີມພະກຽດພະບາດສົມເດັດພະເຈົ້າຢູ່ຫົວ ເນື່ອງໃນໂອກາດພະຣາດຊະພິທີມະຫາມຸງຄຸນສະເຫຼີມພະຊົນມະພັນສາ 6 ຮອບ 28 ກໍລະກົດ 2024 ໃນວັນທີ 12 ພຶດສະພາ 2024.

ເມື່ອວັນທີ 12 ພຶດສະພາ 2024 ເວລາ 06:00-08:00 ໂມງ. ສະຖານເອກອັກຄະຣາຊະທູດໄທ ປະຈຳ ສປປ ລາວ ໄດ້ຈັດກິດຈະກຳອອກກຳລັງກາຍແອໂຣບິດສະເຫຼີມພະກຽດພະບາດສົມເດັດພະເຈົ້າຢູ່ຫົວ ເນື່ອງໃນໂອກາດພະຣາດຊະພິທີມະຫາມຸງຄຸນສະເຫຼີມພະຊົນມະພັນສາ 6 ຮອບ 28 ກໍລະກົດ 2024 ທີ່ສະຖານເອກອັກຄະຣາຊະທູດ.

ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ ໄດ້ກ່າວເຖິງວັດຖຸປະສົງຂອງກິດຈະກຳອອກກຳລັງກາຍແອໂຣບິກສະເຫຼີມພະກຽດພະບາດສົມເດັດພະເຈົ້າຢູ່ຫົວ ເນື່ອງໃນໂອກາດພະຣາດຊະພິທີມະຫາມຸງຄຸນສະເຫຼີມພະຊົນມະພັນສາ 6 ຮອບ 28 ກໍລະກົດ 2024 ຊຶ່ງນ້ອມນຳພະຣາດຊະປະນິທານ ພະຣາດຊະດຳຣິ ແລະ ພະຣາດຊະກໍລະໜີຍະກິດໃນພະບາດສົມເດັດພະວະຊິຣະເກົ້າເຈົ້າຢູ່ຫົວ ທີ່ຊົງເປັນແບບຢ່າງ ແລະ ໃຫ້ຄວາມສຳຄັນກັບການສົ່ງເສີມສຸຂະພາບຂອງປະຊາຊົນ ເພື່ອປູກຝັງໃຫ້ປະຊາຊົນຮັກການກາຍອອກກຳລັງກາຍ ແລະ ການຫຼິ້ນກິລາ ເພາະສຸຂະພາບກາຍ ແລະ ໃຈທີ່ແຂງແຮງຈະເປັນພື້ນຖານສຳຄັນຂອງຊຸມຊົນ ແລະ ສັງຄົມທີ່ເຂັ້ມແຂງ ທີ່ຈະສົ່ງເສີມສະໜັບສະໜູນການພັດທະນາປະເທດຊາດຢ່າງຍືນຍົງຕໍ່ໄປ.

ກິດຈະກຳສະເຫຼີມພະກຽດພະບາດສົມເດັດພະເຈົ້າຢູ່ຫົວ ສະແດງເຖິງຄວາມຈົ່ງຮັກພັກດີຂອງຊາວໄທໃນ ສປປ ລາວ, ຄວາມສາມັກຄີຂອງຊຸມຊົນໄທໃນ ສປປ ລາວ, ຄວາມໃກ້ຊິດ ແລະ ຄວາມເປັນນ້ຳໜຶ່ງໃຈດຽວກັນຂອງປະຊາຊົນໄທ ແລະ ລາວ. ນອກຈາກນັ້ນ, ພາກທຸລະກິດໄທໃນ ສປປ ລາວ ຍັງໄດ້ຮ່ວມສະໜັບສະໜູນອາຫານ, ຂອງວ່າງ ແລະ ເຄື່ອງດື່ມໃຫ້ແກ່ຜູ້ເຂົ້າຮ່ວມງານດ້ວຍ.

ໃນໂອກາດດັ່ງກ່າວ, ສະຖານເອກອັກຄະຣາຊະທູດ ໄດ້ຮັບກຽດຈາກພົນຕີ ວິນໄທ ສຸວາຣີ ຜູ້ອຳນວຍການສຳນັກໂຄສົກສຳນັກງານປະຕິບັດພາລະກິດຮັກສາຄວາມໝັ້ນຄົງພາຍໃນກອງທັບບົກ ແລະ ພົນຕີວັນຊະນະ ສະຫວັດດີ ຜູ້ອຳນວຍການສຳນັກງານປະສານພາລະກິດດ້ານຄວາມໝັ້ນຄົງກັບກອງອຳນວຍການຮັກສາຄວາມໝັ້ນຄົງພາຍໃນຣາຊະອານາຈັກ ກົມຍຸດທະການທະຫານ ເປັນແຂກຮັບເຊີນພິເສດເຂົ້າຮ່ວມກິດຈະກຳສະເຫຼີມພະກຽດພະບາດສົມເດັດພະເຈົ້າຢູ່ຫົວ ດ້ວຍ. ກິດຈະກຳນີ້, ໄດ້ຮັບຄວາມສົນໃຈຢ່າງກວ້າງຂວາງ ມີຜູ້ເຂົ້າຮ່ວມກວ່າ 400 ຄົນ ຈາກໜ່ວຍງານທີມປະເທດໄທ, ພາກທຸລະກິດ ແລະ ຊຸມຊົນໄທ ໃນ ສປປ ລາວ ແລະ ປະຊາຊົນລາວ.