ລັດຖະບານ ສປປ ລາວ ມອບຫຼຽນກາມິດຕະພາບໃຫ້ແກ່ເອກອັກຄະຣາຊະທູດໄທ ປະຈຳ ສປປ ລາວ.

 

ເມື່ອວັນທີ 8 ກັນຍາ 2025 ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ສປປ ລາວ ໄດ້ເປັນຜູ້ເແທນລັດຖະບານ ສປປ ລາວ ມອບຫຼຽນກາມິດຕະພາບໃຫ້ແກ່ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ ເພື່ອຊົມເຊີຍຜົນງານໃນການສະໜັບສະໜູນ ແລະ ສົ່ງເສີມສາຍພົວພັນມິດຕະພາບ ແລະ ການຮ່ວມມືລະຫວ່າງໄທ ກັບ ສປປ ລາວ ຕະຫຼອດໄລຍະເວລາ 2 ປີ 9 ເດືອນ ທີ່ປະຕິບັດໜ້າທີ່ໃນ ສປປ ລາວ ໂດຍມີທ່ານ ບໍວອນທັດ ດວງຈັກ ຫົວໜ້າຫ້ອງການກະຊວງການຕ່າງປະເທດ, ຄະນະການນຳກະຊວງການຕ່າງປະເທດ ສປປ ລາວ ລວມທັງ, ຂ້າຣາຊະການສະຖານເອກອັກຄະຣາຊະທູດໄທ ປະຈຳ ສປປ ລາວ ເຂົ້າຮ່ວມພິທີມອບຫຼຽນກາມິດຕະພາບດັ່ງກ່າວ. ເອກອັກຄະຣາຊະທູດ ໄດ້ກ່າວສະແດງຄວາມຂອບໃຈລັດຖະບານ ສປປ ລາວ ທີ່ໄດ້ມອບຫຼຽນກາມິດຕະພາບ ຊຶ່ງຸຖືເປັນກຽດຕິຍົດ ແລະ ສັນຍາລັກອັນມີຄຸນຄ່າໃນການປະຕິບັດໜ້າທີ່ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ ແລະ ສະແດງຄວາມຂອບໃຈກະຊວງການຕ່າງປະເທດ ແລະ ທຸກພາກສ່ວນຂອງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນ ນ້ຳໃຈໄມຕີຈິດ ແລະ ຄວາມເອື້ອຍເຟື້ອໃນການປະຕິບັດໜ້າທີ່ເອກອັກຄະຣາຊະທູດ ເປັນຢ່າງດີມາໂດຍຕະຫຼອດ. ທັງນີ້, ຫຼຽນກາມິດຕະພາບ ເປັນຫຼຽນເຊີດຊູກຽດຂອງສູນກາງພັກປະຊາຊົນ ປະຕິວັດລາວ ຊຶ່ງມອບໃຫ້ແກ່ບຸກຄົນຕ່າງປະເທດ ທີ່ມີບົດບາດໂດດເດັ່ນໃນການສົ່ງເສີມການພົວພັນ ແລະ ການຮ່ວມມືກັບ ສປປ ລາວ ໂດຍພິຈາລະນາຈາກຜົນງານໃນຊ່ວງໄລຍະທີ່ປະຕິບັດໜ້າທີ່ໃນ ສປປ ລາວ.